3. krajne wuběźowanje „Sprachenfreundliche Kommune – serbska rěc jo žywa“

Rada za nastupnosći Serbow pśi krajnem sejmje Bramborska wuwoła 3. krajne wuběźowanje „Sprachenfreundliche Kommune – serbska rěc jo žywa“.

Na wjele městnach Dolneje Łužyce woplěwa se to serbske žywjenje z wjelikim angažementom. Pśi tom słuša serbska rěc, ako kšuty wobstatk serbskego žywjenja, ku kulturnemu derbstwu našogo kraja. Wóna wugótujo za wjele luźi emocionalnu domownju a komunikaciski srědk wšednego dnja. Tak se serbska rěc njerozeznawa wót drugich wěcej ako 6.000 rěcow na swěśe. Dokulaž jo serbšćina pak mała rěc, pomina se wósebne spěchowanje a woplěwanje.

Pód patronatstwom prezedentki krajnego sejma, kněni Britta Starkoweje, co Rada za nastupnosći Serbow tradicionelnu wěcejrěcnosć Dolneje Łužyce hyšći lěpjej zakórjeniś w zjawnem wědobnju bramborskich luźi, politikarjow a institucijow. Aby widobnje pokazali, až serbska rěc jo žywa, z kótarymi idejami a napšawami se spěchujo, a kak móžo se wóna w zjawnem žywjenju nałožowaś a jo wobogaśiś, startujo 5. septembra 2017 k tśeśemu razoju wuběźowanje „Sprachenfreundliche Kommune (Rěcam pśichylona komuna) – serbska rěc jo žywa“.

Wobźěliś mógu se bramborske towaristwa, iniciatiwy, kupki, amty, města, gmejny abo wejsne źěle. Zapódaju-li se z jadnogo sedlišća wěcej pśinoskow, Budu wóni za gódnośenje zgromaźone.

Waše pśinoski su pšašane! Pytamy serbskej rěcy nejwěcej pśichylone města a komuny.

Zapódaś mógu se mapy, teksty, filmy, power-point-prezentacije abo multimedialne produkty. W nich dej se wobrazliwje dokumentěrowaś, co Sćo až doněnta dojśpili:

• Źo a kak se pśi Was serbska rěc nałožujo?
• Kótare aktiwnosći a procowanja k spěchowanju serbskeje rěcy su se we Wašom bydlišću pśewjadli?
• Dajo pśi Was kreatiwne ideje, ako howacej njedajo?
• Kótare pśedewześa se pśigótuju?

Slědny źeń zapódaśa jo 5. měrc 2018.

Ako wuznamjenjenje dostanu serbskej rěcy nejwěcej pśichylone komuny wěcne a pjenjezne myta. Za pśewšo zajmne ideje a iniciatiwy cakaju na Was wósebne a spěchowańske myta.

Wšykne wobźělniki se zjawnje pócesće na swětocnem zarědowanju 13. apryla 2018.

Móžośo jano dobyś!

Pšosym pósćelśo Waše pódłožki na dołojce pomjenjonu adresu:

Krajny sejm Bramborska
Rada za nastupnosći Serbow
Stare wiki 1
14467 Podstupim

Telefon: 0331 966-1157
Faks: 0331 9661174
E-Mail: sorbenwendenrat@landtag.brandenburg.de